凯宇：写给爱（旁听）

親愛的K仔，

我仍然鐘意將你喚作K仔。似乎有個暱稱，就足以為你失色塊面補下妝容。

我知你早在好多年前，不覺意簽咗份安樂死同意書。但媽媽話，你有過一段流金歲月，有好多無所畏懼嘅哥哥姐姐，抱起初初學語嘅我。

作為一名癌末病患，你間唔中入手術室，換血重建再接駁嘅血管，失去太多嘢。加上器官臟腑日趨綿密硬化，被催淚嘅癌細胞擴散佔據前，所有良好細胞堅持對抗嘅集體初衷，尚且只係愛你，一如當初。如今一批化療軍隊已駐守在旁、反復練習。時辰一到，佢哋必然會將好細胞一併撲殺埋。多數歷經代謝嘅老細胞，早已喪失為你運作嘅特性。醫生原本話，你嘅語言如像壽命，剩低半個世紀。但逐年落黎，正常呼吸嘅你戴上氧氣罩，終需機器維持生命。明明佢哋見證過你被世人景仰嘅青春，卻只能眼望望，見你喺辯駁無解嘅謊言裡掙扎、日漸消瘦。

你嘅沉默難分晝夜。被鏡頭拉伸過無數情愛嘅海岸線，一部分經已壞死在化療之下。癌細胞不斷入侵，血液不停排斥，醫生嘅方針建議統統轉為譴責。你不停食藥。由自由行動嘅輪椅轉為一張硬邦邦嘅窄床，你可會醒番？但你嘅苦衷無可言說，像我註定膽細心粗。喺你深陷皮包骨嘅缺氧掙扎，甚至終將昏迷失憶前，我提前嘅離開，其實都出自於愛。

假使你係一座不靠海嘅內陸城市，我諗我都會對你一往而深。好想返去探你。


探訪於2019年5月

（聲聲喚喚的一字一句，憂憂傷傷的一人一地，仿佛是趁一片繁華的鋼骨水泥，在還未崩塌消失之前，寫了一封傾城之戀的書信，雖然愛無法逆轉命運的苦難，至少愛可以還原掙扎的尊嚴。）